Palestinian Arabic Course

الأَب: جَهْزُو حَالْكُم ...رَح أَخُدْكُم اليُّوم عَلَى المَطْعَم نِتْعَشَى ونْغَيِّر جَو..

حَسَن: بتِحْكِي عَن جَد يَابَا؟!! وَالله فَرَّحْتْنَا كِتِير...

الأَب: واللاَّ كِيف رَح أَخُدْكُم وأ خُد أُمْكُم قَبِلْكُم.

بَسْمَة: خَلَص نرُوح نِلبِس ونجَهِّز حَالْنَا هَلأ يَابَا..

الأُم: فِكْرَة حِلْوَة كتِير يَاأَبُو الحَسَن!! الله يخَلِّيك فُوق رُوسْنَا..

الجَرْسُون: مَسَا الخِير كِيف بَقْدِر أَخْدِمْكُم؟!

الأَب: بِدِّي مَشَاوي مشَكَلِة...

الجَرْسُون: فِي عَنَّا كَمَان سَمَك اِذَا بِدْكُم؟

الأُم: شُو رَأيكُم لَو كَان جَاج مسَحَّب؟ بِيكُون أَحْسَن لِلولاد...

بَسْمَة: مَابِدْنَا سَمَك...مَا بحِب لاأَنَا وَلا حَسَن..

الأَب: يَاريت تجِبِلْنَا شوَيِّة سَلَطَات ومخَلِّلات مَعَ المَشَاوي..

يَعْنِي تَشْكِيلَة ..سَلَطَة خَضْرَا..وسَلَطِة حُمُّص وسَلَطِة لَبَن بِخْيَار(سلطة زبادي) ...وسَلَطِة طَرْطُور (سلطة بقدونس بطحينة).

الجَرسُون: حَاضِر يَاسِيدِي..

حَسَن: طَيِّب مُمْكِن أَخُد بَطَاطَا مَقْلِيَّة؟

الجَرْسُون: اِن شَالله عَلَى عِينِي..

الأُم: لَو سَمَحْت خَلِّي الكُولا والبِيبْسِي بَعْد العَشَا عَشَان الولاد يَاكْلُو منِيح ..

الجَرسُون: حَاضِر خَيتَا...اِنْتُو بَس أَرْبَع أَشْخَاص؟

الأَب: أَيوَه بَس أَرْبَعَة مَاحَدَا جَاي مَعْنَا..

بَسْمَة: لَو سَمَحْت مَاتِنسَى الكِيتْشَب والمَايونِيز والمَسْطَرْدَة..

الجَرْسُون: حَاضِر يَاأَمُورَة عَلَى عِينِي..كُل الأَطْفَال مَابِيَاكْلُوش مِن غِيرْهَا..

الأُم: الله يُسْتُر كُل هَالشَّغْلات فِيهُم مَوَاد حَافْظَة!!

الأَب: يَاللاَّ خَلِّيهُم ينْبِسْطُو...شُو رَأَيكُم تقُومُو تِلْعَبُو شوَي عَلَى بِين مَايجِي الأَكْل؟

بَسْمَة: حَاضِر يَابَابَا...يَاللاَّ يَاحَسَن..

الأَب: مِن زَمَان مَاطلِعْنَا سَوَا!!

الأُم: الله يعْطِيك العَافْيَة يَارَجَّال..لاِنْت عَم تِتْعَب كتِير فِي الشُّغل..

                                        

فَرَج: شَباب مِن غِير اِحرَاج...كُل شِي غَلْيَان فِي هَاالبَلَد..المَاي والكَهْرَبَا ...يعنِي عَدَم المُؤَاخَذِة أَيَّا وَاحَد بِيُطْلُب طَلَب مِش يُقعُود طُول النْهَار عَلِيه!!!!

زُبُون: مِش فَاهِم!! اِيش بَدَّك؟!كُل نُص سَاعَة نُطلُب طَلَب!!

فَرَج: اه يَاحَبِيبِي ..كُل نُص سَاعَة بِدَّك تُطلُب طَلَب..هَاي مِش كَافِيتِيريا جَامِعِيِّة!!..الشَّاي بِنجِيبُه مِن بَرَّه والبِن بِنجِيبُه اِستِيرَاد كَمَان وبَعدِين اللِّي مِش عَاجْبُه ينَتِّف حَوَاجبُه..

نِزَار: مَالَك يَافَرَج!؟ مَالك؟! اِلِي سَاعَة سَامِع فِيك ومِش فَاتِح تِمِّي بِوَلا كِلمِة! الكَهرَبَا سِرجِة (سرقة) والمَاي لاطِش مَاسُورَة مِن وَرَى العَدَاد ..النَّعنّع عَم بِتلَقْطُه مِن الأَرِض...

فَرَج: وَالله حَرَام عَلِيك يَا نِزَار....

نِزَار: يحرَم جِلدَك عَن عَضمَك...رُوح رُوح سَاويلِي كَاسَة شَاي بِالنَّعْنَع ..خَلِّينِي أَمَخمِخ...واِنتُوا يَاشَبَاب الأَسعَار زَيِ مَاهِي...فِش اِشِي غِلِي وفَرَج كَان بِيمْزَح مَعَكُم...

فَرَج: خَلَص بِيكَفِّي يَازَلَمِة!! 

نِزَار: مَالَك يَافَرَج؟! مَالَك؟! وَالله مَخنُوجِين ...مَالنَا الاَّ الجَهَاوي (القهاوي) نُجْعُد فِيهَا لَيكُون بَدَّك اِتدَفِّعْنَا حَج الهَوَا يَاللِّي بِنْشِمُّه ...كُلُّه ملَوَّث الهَوا!!

زُبُون: طُول عُمْرَك كِبِير وحَجَّانِي( حقاني) ودُوغري يَانِزَار...بَعدِين مَع هَاالغَلا يَاشَبَاب؟!!!!!

نِزَار: بُكرَه رَح نسَاوي مُظَاهَرَة ضِد غَلاء الأَسْعَار ...مِين بَدُّه يشَارِك؟

زُبُون: بِنْشَارِك لِيش لَأ؟!!

نِزَار: الله يكُون بعُونكُم يَاشَبَاب..كُل شِي فِي هَا البَلَد صَار غَالِي...اِيش بَدْهَا النَّاس تسَاوي يَعْنِي؟!! وين كَاسَة الشَّاي يَافَرَج؟!! وحُطِّلِّي عِرِج (عرق) نَعنَع مِن يَاللِّي بِتْلَجْطُه (يجمعه سرقة من الارض او الزراعات)......